السي حسن، إيلا كلنا ليك لخص لينا سلسلة «لكوبل» فجوج سطورا، أش غادي تكول لينا عليها؟
مزيان مين كلتي ليا غير جوج ديال السطورا، حيث حتى هي أصلا فيها غير 3 ديال الدقايق. إيوا أش غادي نكول ليك آسيدي أنا ودنيا بوطازوت، اللي كنقدمو الشخصيتين ديال الشعيبية وكبور، هما جوج ديال الناس شارفين.. أولادنا شي جوجناه، وشي صيفطناهم لبرا وتهانينا منهم، وبدينا حياتنا أنا والشعيبية ديالي.. مون كوبل. وكيما شفتو من خلال الحلقات الأولى من هاد السلسلة، احنا عايشين غير في العروبية وعايشين باش ما قسم الله، وأكثر من هذا احنا اللي كنصيفطو القديد لبنتنا اللي في الطاليان (ههههه..).. وأنا كنكول واقيلا قصر المدة ديال هاد السلسلة هو اللي عطى للمشاهد واحد متعة كوميدية ذكية بزاف.. آه نسيت الشعيبية، فحتى بوطازوت تقنات الدور ديالها برافو عليها..
كول لينا واش كنتي تاتوقع النجاح اللي حققتو سلسلة «لكوبل»؟
بالعمى.. أنا ما كنتش متوقع أنها دير خبلة والناس بغاوها كيما أنا بغيت بوطازوت في «لكوبل» (هههه)، بيني وبينكم ياك جينا مواتيين مع بعضياتني ولا لا (ههه)، غير كنضحك معاكم، ولكن الحمد لله السلسلة رغم القصر ديالها ولكن فيها معاني بزاف. حاولنا نكولو فيها بزاف ديال الحِكَم، ونجسدو دور زوج ديال الناس مزوجين بقاو طيط أطيط جمعاتهم الظروف ديال البادية… دابا غادي نهضر بالمعقول باراكا من الضحك. «الكوبل»، أسيدي، هو عمل جماعي تطلّب مجهودا كبيرا من مجموعة من الشباب؛ خاصة المخرج الشاب أمير الرواني اللي بيّن على حنة يديه، راني تحمست للخدمة معاه بعدما درنا 3 حلقات نموذجية، وتبين ليا بلي السيد راه ما ساهلش وعندو ما يكول توكلنا على الله، والحمد لله ما خيبناش.
كول لينا شكون الشعيبية وشكون كبور؟ منين جبتو هاد الزوج ديال الشخصيات؟
راه هاد الشخصيات موجودين فين ما مشيتي، سواء داخل المغرب وفي خارجه. واحد القضية راه الموضوع ديال سلسلة «لكوبل» قديم غير المعالجة (ماشي القص المعالجة ديال الموضوع) والتناول (ماشي القص تاني التناول ديال الموضوع) كان من زاوية جديدة داكشي علاش بان الموضوع جديد ولقا الإقبال. راه من قبل طرقوا لهاد الموضوع مجموعة من الفنانين؛ غير حنا خدمنا عليه شويا وجاب الله التيسير.
شحال خذات منكم السلسلة ديال «لكوبل» من الوقت والمجهود؟
خويا، راه حتى حاجة ما ساهلة في هاد الزمان كلشي ولى قاصح. «لكوبل» خذات لينا شهر ديال الكتابة والمعالجة؛ رد البال راني كلت ليك كتابة النص والتنقيح ديالو هي اللي خذات لينا شهر، ماشي ثاني الماكلة عنداك يغلط شي حد يكول هذا راه ما صايمش ونوليو في شد ليا نقطع ليك. وأما التصوير، فكلفنا أسبوعا متواصلا ديال الخدمة.
سيمانة ديال الخدمة كيف درتو ليها؟
واياه سيمانة. كانت قاصحة شويا؛ ولكن راه الضومين ديالنا هكذا داير، كنا مزحومين بالوقت داكشي علاش.. كان شويا ديال التكرفيس؛ لكن كفيما تايكولو كولشي في سبيل الجمهور تا يهون، ودازت هاد السيمانة بخير ومزيانة معا الوجوه الزوينة.
كول لينا واش أنت اللي قلبتي على الفنانة بوطازوت ولا هي اللي قلبات عليك؟
أولدي؛ راه دنيا خدمات معايا في عام 2004 في سلسلة «شانيلي تيفي» إلى عقلتي عليها، راه بوطازوت فنانة كبيرة بزاف، راها كيف ما تا نكول ليها ديما راها صبيطار متنقل الله يحفظها وصافي. راه من المفروض الناس اللي خدمتي معاهم تا تعرف نقاط القوة والضعف ديالهم ومنين تاتبغي دير شي خدمة جديدة تاتشوف الناس اللي يصلاحو لهذاك الدور. الدور ديال الرجل البدوي المغلوب على أمرو جا معاك..
واياه راه كاع كالوها ليا، وهذا راه ماشي مصطنع؛ لأن خوك راه بدوي أبا عن جد،
كيف ما تايكولو الكوايريا ديالنا. داكشي علاش انسجمت مع الدور، حيث قيصتو
جات كدي، وأنا لبستو ياك بعدا ما جاش واسع عليا.
منين جا كدك هاد الدور واش غادي تبقا ديما تلبسو وتمشي في هاد الستيل؟
شوف الفنان بحال الفاس فين ما مشا يحفر، وكيف ما جا الدور خاصو يخدمو
ويتقنو. المهم هو يحافظ على شخصيتو، لا يمشي يتوضر في شي دور وما يبقاش يخرج منو، راه صعيب الحال. الواحد هو اللي
يحضي راسو، والواحد هو اللي يبدل الستيل مرة مرة.
شي وحدين ولاو تا يكولو بلي الفد هو اللي تايضحكنا في رمضان. واش انت ما خايفش على راسك من العين؟
يا ودي أش من عين ولا غين، المهم الله يستر وصافي.. اللي بغيت نكول هو أن الإنسان يلا خدم واجتهد تا يوصل، وحنا درنا السباب والكمال على الله. راه الفن هو هادا، مرة يطلع ليك الجوك فيه ومرة يهبطك بحال داك الشي ديال البورصة ديال المعاملات النقدية، والله يجيبنا في الصواب وصافي.
من بعد سلسلة «لكوبل»، أش غادي تدير، واش كاين شي جديد؟
أنا غادي نكول ليك واحد الحاجة، ولكن خليها بيناتنا تبقى بيني وبينك ما تكولها حتى لشي حد، راني خدام على واحد «لكوبل» جديد؛ ولكن هاد المرة غادي يكون تايسكن في المجال الحضري، كوبل من طبقة متوسطة، غير هو شكون اللي غادي يكون معايا فيه باقي ما عرفتش، حيث باقي ما درناش الكاستينغ ونتمى باش يعجب الجمهور حتى هو بحال هاد لكوبل اللي تدوز الحلقات ديالو فرمضان.
